लॉकडाऊन आणि जनरल प्रॅक्टीशनर-

लॉकडाऊन परिस्थिती आणि जनरल प्रॅक्टीशनर-

डोंबिवलीतले सारे ऍलोपथी एमबीबीएस फिजिशियन्स आपापले दवाखाने बंद करून बसलेत.

याऊलट, होमिओपॅथ, आयुर्वेदाचार्य यांनी आपले दवाखाने एकही दिवस बंद ठेवले नाहीत.

हे माझ्या परीसरातलं, माझ्या अनुभवातलं सांगतेय. दहा लाखाच्या डोंबिवली वस्तीत इतरत्र वेगळी परिस्थिती असेलही. मला माहीत नाही. परंतु माझ्या घरापासून ते स्टेशनपर्यंतच्या एक कीमी परीघातील परिस्थिती ही आहे.

त्यामुळे परिस्थिती खूप बिकट आहे. इतर कोणत्याही छोट्या मोठ्या आजारांसाठी नेहमीचे डॉक्टर्स अव्हेलेबल नाहीत.

अशावेळी होमिओपॅथ, आयुर्वेद हेच लोकांना धीर आणि औषध दोन्ही देणारे देवदूत वाटताहेत मला.

एरव्ही हे ऍलोपथी छोटे-मोठे सारे दवाखाने भरून, ओसंडून वाहात असतात. पण खऱ्या आणीबाणीतच ते बंद आहेत.

माझ्या परीसरातील हे सारे एमबीबीएस डॉक्टर्स साठीच्या वरचे आहेत. तेही कारण असू शकेल. मी त्यांना दोष अजिबातच देत नाही.

पण होमिओपॅथ डॉ्क्टरही त्याच वयाचे आहेत माझे. त्यांचा त्यांच्या औषधांवर इतका विश्वास आहे. मात्र ऍलोपॅथचा स्वतःवरच विश्वास नाही असं समजायचं का...?

मोठे हॉस्पिटल्स आहेत तिथले एम.डी, एम.एस. डॉक्टरही म्हणे आपल्या स्वतःच्या घरातून व्हिडिओवर संवाद साधतात पेशंटशी. प्रत्यक्ष येऊन तपासत नाहीत. बघत नाहीत.

परिस्थिती खूप बेकार आहे. या अशा पावसाच्या सुरुवातीच्या वातावरणात नेहमीचे आजार, ताप, संसर्ग इत्यादी उचल खातात आणि कोरोनाची भीती अधिक वाटते. अशावेळी त्या पेशंट्सनी जायचं कुठं? एरव्ही हा सिझन म्हणजे डॉक्टरांच्या कमाईचा सिझन. त्यांना आता आपल्या पेशंट्सविषयी आस्था नसेल का?

-अलका गांधी-असेरकर

-